本欄六月二十四日寫《異人拆穿心事》，諗唔到竟然會引來十幾份電郵，個個讀者都想知道「異人」究竟係何方神聖，佢哋去曼谷可唔可以約見，俾異人睇相。
上述文字出街後，Y律師打電話嚟鬧左丁山，話我太多事，連異人嘅說話都寫埋出嚟。老實講，本欄以娛樂讀者為要務，異人嘅故事我哋夾埋聽咗唔少，有啲係親耳所聞、親眼所見，寫出嚟唔係導人迷信，只不過旨在與讀者分享而已。
各位讀者想知道曼谷異人嘅聯絡方法，恕難告知，因為即使左丁山去曼谷，佢唔高興嘅話，電話都唔會聽，何況佢經常要跟大人物視察，未必有時間騷我哋。同佢碰頭，乃是緣份而已。奇人異士未必要開門做生意，代人占卜算命睇相，呢位異人十幾年前自加拿大回港，好快就聲名遠播，冇幾耐就俾人請咗過去泰國，達官貴人大商家專門搵佢研究趨吉避凶之術，平民布衣唔會見到佢嘅。

十年前喺中華總商會與中環老友吃晚飯，偶遇異人，係第一次見到佢。朋友起哄話：「睇睇左丁山個相？」異人叫左丁山企起身，在房內行一個圈，再望吓左丁山嘅面相、眼、耳、鼻、額頭，之後佢輕描淡寫咁話：「你呢世唔會發達，不過人緣好，朋友多，一定聲名遠播，之不過好睇唔好食啫。」十年發展下來，果然如此，真係捱到心淡。
九六年中，市面上傳出四人競選特區行政長官，異人訪港，與朋友吃晚飯，有人畀四張相佢睇，問：「邊一位會做特首？」佢話：「四個都唔似孭得起呢個位噃！」朋友爭住講：「董生係大熱門！」異人於是再睇真啲，然後講咗一句：「佢做就香港唔掂！」此事有若干朋友在座，聽到實，唔好以為左丁山亂咁作嘢。