「兩個就夠晒數！」係70年代家計會嘅宣傳口號，堪稱經典，但語帶雙關嘅廣告對白「貴精不貴多，兩粒就夠喇」，大家又聽過未？家計會趁今年成立60周年舉辦回顧展，展出幾十年嚟經典海報、電視廣告同電台宣傳聲帶，當中港人集體回憶，相信係83年關德興師傅大鬧徒弟秦煌嘅醒世名言：「家庭計劃，你都唔敢負責，你仲係男人嚟嘅！」

除咗關師傅，好多名人都做過家計會代言人，80年代搵影星馮寶寶宣傳節育：「寶寶唔駛多，最多生兩個」；呼籲婦女年年驗身又係佢：「我呢個約會你都應該去嘅！」回顧展有不同年代嘅子宮環、女性結紮手術儀器展出。家計會服務對象包括男性，宣傳手法算大膽前衞，86年播出嘅「家庭計劃要做得哥」電視廣告傳頌一時，自此令「得哥」成為男人「唔得」嘅代名詞。青少年情竇初開易「搞出人命」，當年「心思思，有件事，遇疑難，話我知」嘅宣傳口號，係咪好有親切感呢！
家計會1950年成立，前身係香港優生會。執行總監范瑩孫醫生同八方講，戰後香港人口不斷膨脹，佢哋要去徙置區、工廠教人節育，又印刷多圖少字宣傳單張畀艇戶同農民，唔識字都要識避孕。
時移世易，家計會以前叫人唔好生咁多個，近年卻要幫人生仔，范醫生話近幾年尋求生育指導計劃嘅人，由04年1,240人，上升到08年1,895人，「真係好好生意」。

家香港人生小朋友一個都嫌多，特首仲叫人生三個先夠數，范醫生好感慨咁話，時下女性工作行先，要有車有樓，仲要等埋升職先肯生仔，眨眼30幾歲，生育能力減低，後悔就太遲。家計會「六十周年歷史珍藏品回顧」展覽聽日開始一連三日喺香港教育學院舉行，今年滿60歲嘅婦女，仲可以優惠價60元（原價150元）去家計會做子宮頸細胞抹片檢查，名額暫時得600個。
mailto:[email protected]