由金宣兒、甘宇成主演嘅SBS新劇《能先接吻嗎》正喺韓國熱播，港劇迷可於Viu上同步觀看。劇集噚晚播出第9、10集，劇情承接上集講到甘宇成邀金宣兒到佢屋企瞓，金宣兒幾番掙扎後決定上去，而甘宇成、金宣兒兩人明明都好在意對方，但扮到冇嘢咁，感情上似乎有所發展。

朴詩妍得知劇中老公吳智昊偷偷幫助其前妻金宣兒，大感心痛，更去到金宣兒家中大鬧，隨後甘宇成向朴詩妍坦白，表示金宣兒全晚同自己一齊，唔知吳智昊去咗邊。朴詩妍打畀吳智昊求和時，就提到甘宇成、金宣兒搭上嘅事，唔知吳智昊又會唔會放唔低金宣兒而走去破壞兩人？

甘宇成到醫院探望女兒後，回家時見到金宣兒企咗喺自己屋企門口喊，令佢諗起多年前與金宣兒相遇嘅第一日，當時金宣兒剛失去女兒，喺墳場一直痛哭，因此向金宣兒提議，跟佢瞓七次，並與金宣兒咀嘴，未知會否刺激到兩人嘅感情。

雖然《能先接吻嗎》噚晚上演吻戲，不過未能刺激收視，第9、10集分別為9.3%及12.3%收視率，比上周收視率微跌，但仍然穩坐收視冠軍，至於KBS嘅《Radio Romance》收視就上升至4.0%，排同檔第二名。

更多韓流，喺晒《娛果》
http://fb.com/appledailyent