中國稀土（769）上星期五一支箭升咗近20%，場內同稀有資源有關嘅股份，包括中國鋯業（395，前稱亞鋯），同日只升4%，兩個字：「抵炒。」
中鋯主打稀有金屬「鋯」化學品銷售，兼拓展鋯高溫電池業。啱啱公佈嘅07年半年度（6月底止）業績，純利錄到14%雙位數增長，到3715萬銀人仔。只係好保守計數，下半年純利同上半年睇齊，中鋯07年度純利7430萬銀，增長28%，PE都係講緊11倍多啲，現價（1.22元）P/B亦不過1倍鬆少少。
再講，鋯係核能發電嘅主要基本物料，配合祖國未來發展核能發電國策，中鋯前景應該仲爆炸。喺香港經營鋯相關業務嘅公司，只得中鋯一家，同類A股，預期PE講緊20倍樓上，P/B炒到上3倍，中鋯平霸。中鋯追上A股PE，要升64%到兩蚊。

景福多得港交所帶挈

景福（280）揸住港交所（388）187.4萬股，上星期五外滙基金掃貨，大升10蚊，景福肥過肥仔水。
計計數，由景福07年度3月底年結日到家陣，港交所已經翻超過一番，為景福帶嚟1.5億銀額外增值。以景福由上星期五開市價0.88元計，要反映港交所3月以嚟，為佢每股帶嚟額外增值0.35元，要見1.23元，即係現價（0.99元）要再升多24%，到時，景福P/B仍然企喺1倍樓下，短炒啱路數。
錢雋