有立法會「多仔公」之稱嘅公民黨陳家洛，有四個千金同一個囝囝，千金吸「睛」，囝囝就精靈，家洛對於育兒有一定好有心得啦，但原來佢對小朋友一直採取「無為而治」嘅放任式教育，而呢套教學法原來係沿於佢兒時嘅經歷喎！

家洛同八方講，喺幼稚園度過快樂童年，皆因輕輕鬆鬆都考到第一名，升小學入咗聖方濟各英文小學後，「第一次英文默書考airplane(飛機)，覺得好深」，經歷「挫敗」，到小二時更試過中、英、數三科唔合格，成日都要見家長，當年仲有體罰，數唔清畀老師打過幾多次手板。

直到升上中學先「開竅」，成績突飛猛進，中一起一直考前三甲，仲係校內「飛魚」，水運會拎獎牌拎到手軟，中三時仲被推薦到香港體育學院前身銀禧體育中心接受訓練，但當年中三仲有淘汰試，佢每晚練完水返到屋企都10點幾，為咗學業最終退出集訓。

文武全才，一定係校園風頭躉啦，佢笑言讀長沙灣天主教英文中學，係一間男校；到中六收女同學，「不過當時呢方面競爭力不足」，所以同學仔好快成雙成對，佢就成個中學生涯都一支公，未拍過拖㗎。（搵到個咁靚嘅波蘭老婆，拍少幾次拖又何干吖！）

講返湊仔經，細仔道明已經4歲，由於同家姐年紀有一段距離，家洛話都有同太太諗下，要用乜嘢方法教育，但最後覺得父母唔可以做「強力部門」，都係等佢哋自由發揮天賦，摸索人生。