【撬牆腳?】35歲洪永城秘撻女模 新歡同北京男友火速斬纜
梁諾妍洪永城唐詩詠
35歲洪永城同唐詩詠於舊年喺社交網公告分手,兩年半情玩完,當時兩人各自被傳偷食,有指唐詩詠被洗米華愛將盧啟邦狂追,洪永城則暗撻蔡思貝,所以搞到分手收場。時間過咗年半,最近呢對舊愛又各自出現新歡,上月唐詩詠被《蘋果》影到同「英識教育」執行董事陳思銘到九龍塘開餐,今日輪到洪永城傳出搭上模特兒兼長跑教練梁諾妍,有傳媒影到女方到洪永城屋企過夜。
30歲嘅梁諾妍係種星堂旗下model,即係周柏豪同連詩雅嘅師妹,梁諾妍仲係一名運動健將,做咗model後亦有勤練長跑,曾參加挪威奧斯陸嘅半馬拉松同日本東京嘅全馬拉松,亦係連詩雅旗下夜跑隊My Girls成員,之前仲加入鄧麗欣旗下排球隊Loey,現於中環開設健身工作室。
愛運動嘅梁諾妍經常在社交網晒跑步滴汗相,擁有殺死人嘅腹肌,面上仲有可愛小酒粒,笑容甜到漏,唔怪得可以擄獲洪永城。有指洪永城都係愛跑步,兩人因為有共同興趣,一撻即着,惟2個月前梁諾妍仲有個拍拖2年嘅北京男友,唔知洪永城係咪做咗第三者呢?又會唔會係為咗洪永城火速斬纜呢?
操得一副弗爆身材嘅梁諾妍,曾在社交網留言:「做了幾十年人,我在去年才有自信地穿起背心,是因為運動啊,那時候我就有個想法,常常覺得脂肪永遠弄不走,不如乾脆瘋狂做運動,努力將所有脂肪變成肌肉,起碼別人看起來是壯,也好過是肥。」
對於跟洪永城爆戀情,梁諾妍透過經理人回覆《蘋果》:「大家了解中,俾少少空間給他們,謝謝大家關心。」
精選娛聞,喺晒《娛果》
http://fb.com/appledailyent