讀萬卷書不如行萬里路？聲言月讀30本書的教育局局長吳克儉，五年任期以飛機代替雙腿「自我增值」，《蘋果》綜合其多達54次外訪行程，發現其足跡遍及美加英德澳紐秘魯韓國新加坡，逾300萬外訪開支換來21.6萬飛行里數，離港日數逾150天，獲封「旅遊局長」。「辦教育係用政績證明能力，唔係用飛行里數！」前立法會教育事務委員會主席林大輝直言對吳卸任在即，頓覺解脫，「壓喺心口塊石頭就快拎走，對教育界同香港人嚟講，噩夢就快完結。」

記者許偉賢

「梁粉」局長中，以吳克儉最惹火，上任之初要由時任政務司司長林鄭月娥拆彈的國教風波，令其民望急促下挫，港大民意研究計劃顯示其最新支持度僅15%，較上任之初的約33%，蒸發逾半，五年來一直是民望包尾局長，偶爾與受劏房及囤地風波影響的發展局局長陳茂波互換位置。

掌握莘莘學子前途的他，卻非以教育見解聞名，而是以外訪次數多見稱。當局數字顯示，吳五年外訪逾54次，距離任期完結越近，外訪次數竟越多，預告離開熱廚房的他今年至五月已出訪17次。

細數五年遊歷足跡，遍及世界各地：2013年到英、美、加、澳，2014到訪比利時、芬蘭、德國與瑞士。2015年續訪歐盟，2016年趁APEC會議遠赴秘魯利馬，此程單次已達已花40.5萬。告別之年未有停下步伐，開拓泰國越南緬甸等新旅程，惟「食放題好正」、「睇星好靚」、「雜誌好刺激」的日本則不在外訪名單，因為2015年缺席立法會TSA公聽會，是外遊非外訪，雖然他曾將外訪當放假，可見兩者，一線之差。

「嗰次（缺席TSA）就見到佢嘅時間管理好差」，多度與吳「交手」的林大輝嘆吳似乎未知教育局長本業為何。教育界議員葉建源其實早在2012年底已提出要求吳下台的動議，當時尚未為現屆立法會教育事務委員會主席的民建聯蔣麗芸曾指：「唔推咪唔推（國教）囉，你使唔使炒咗佢？」，林大輝亦未有支持吳下台，「當時佢剛上任，或者唔熟悉處理政府運作，對官場陌生，雖然有重大錯誤（國教風波），都希望佢糾正，重新做好工作，但之後都係進退失據...辜負建制派對佢嘅寬恕同心血。」

64歲明言退休的吳克儉曾在今年為自己平反，忿忿不平稱部份人士對其的負評是「人格謀殺」，林大輝直言委任吳的梁振英也要為吳的負評負責，指梁曾經在任期中段換局長（曾德成及鄧國威），「點解聽到咁多批評，都無動於衷，由得佢繼續做？」，林稱不知道吳是毛遂自薦抑或有伯樂，若是前者，寄語想入政府者先自我檢討，別以為有一點擅長就可做局長，「如果佢係梁振英搵，就肯定（梁）係『跌眼鏡』啦；如果係有人推薦，推薦佢嘅人就以後唔好再推薦人嘞。」

能否舉出吳任內一項政績？「呢個難㗎，真係難㗎，如果叫我搵佢五年來一樣工作嚟讚佢、認同佢，唔容易㗎，要畀時間我思考下，就算有，相信都係我夾硬講出嚟。（但佢好學喎，月讀30本書同雜誌增值喎....）呢個就係佢嘅閱讀書本嘅能力同速度啦，咁希望佢離任後將呢項『絕技』教大家啦，希望對閱讀能力有問題嘅學生有幫助啦。」

【吳克儉外訪StoryMap】

手機用戶請按此觀看
http://bit.ly/2rE4PnC