亞視56周年曾經搵人設計咗一個Logo，結果出晒事……網民話似「死」字，今次亞視無限復活，借App還魂，今次新亞視台徽，亞洲電視行政總裁吳雨解釋：「用鑽石代表永恒，出到嚟大家光光閃閃，同埋好colourful，喻意有好多精彩節目，剛才出嚟都睇到，好有氣勢。」

問到係唔係之前個logo係唔係唔太老泥？吳雨笑咗一笑：「唔好咁話人，都係一個亞視，每個投資者都負出好多努力，每一段都有佢嘅歷史，係值得回憶，唔好抹煞，如果唔係我老細都唔會投資落亞視，不如增加ABC台，點解要。我畀佢打動咗，香港得兩個電視台，一係無綫，同亞視，代表港人文化，無咗亞視，香港好似缺乏咗啲嘢，呢樣值得真係想做起。」

咁藝人出糧會唔會準時？吳雨承諾：「第一個任命，兩樣不能，員工同出面外判，要準時找數，咁先相信你。有咩好擔心，我出唔到糧，我都受唔到係受害，但唔會嘅，老闆多上市公司，港人之福，有人咁大投資，回報未必即時，值得呢份想法要支持。」

問到有冇計幾耐翻本，吳雨直言目前唔計呢樣嘢：「OTT呢樣嘢係大勢所趨，因為好多收入，唔係剩係靠廣告，一定係靠用戶，呢個係一個網絡平台，其實我哋開放過一個平台出嚟，唔同電視，呢個平台做咩都得，好難估計，呢個App(每月)$38，喺自家機頂盒就係$68一個月，免費任睇就去到3月31號。」

佢稱全球係行OTT網絡電視，甚至認為香港落後緊，大陸已經有好耐，佢續道：「我哋o依家先開始，TVB都係開始咗，我覺得係好嘅，可以教到觀眾睇好嘢係要付費，真係要付費，無辦法，因為版權真係好貴，咁樣先有競爭，喺個市場生存到，我哋唔會同任何電視台競爭，我哋係自己做自己嘢。有錢就買多啲劇，冇錢就做多啲自己嘢，有你有創意，隨時掟嚟幫你包裝。」

更多娛聞，喺晒《娛果》
http://fb.com/appledailyent