【馮仁昭四圍超】拖老公抱女買禮物
洪欣宣示主權
蘋果日報 2018/08/02 00:00
現年46歲嘅洪欣與細佢9年嘅內地老公張丹峰結婚9年，日前有網民提出五大疑點，質疑張丹峰同嫩口經理人畢瀅有曖昧，之後張丹峰透過工作室發律師聲明，澄清傳聞全部虛構，而洪欣開腔撐夫外，亦承認畢瀅係佢哋一家生活嘅親密夥伴。
洪欣噚日同老公張丹峰，同埋四歲囡囡張晞彤喺銅鑼灣行街。
任阿女揀精品
張丹峰傳出疑出軌後，本報噚日就喺銅鑼灣撞到佢同老婆，同埋四歲囡囡張晞彤行街，當時大概3點幾，兩公婆都以cap帽遮樣打扮，而洪欣仲一臉素顏現身時代廣場，張丹峰就負責抱女，佢哋首先入咗一間時裝店，行咗一陣就搭電梯去咗一間兒童精品店。囡囡入到舖頭就好有主見，由爸爸抱住揀背囊仔、袋仔，之後更落地揀Hello Kitty精品，兩公婆都好有耐性任囡囡慢慢揀。
隔咗一陣，由洪欣埋單走人。佢哋離開嗰陣，就聽到囡囡好嗲咁叫「爸爸爸爸」，而張丹峰一臉冧樣，亦有同老婆咬耳仔，記者上前想搵佢哋做訪問，洪欣就耍手擰頭：「唔好意思，唔做訪問，冇乜嘢，唔該晒。」而張丹峰喺隔籬猛話「唔該晒」，就行到Sogo後面一棟大廈搭𨋢上樓。
撰文：馮仁昭
隔咗一陣，由洪欣埋單走人。佢哋離開嗰陣，就聽到囡囡好嗲咁叫「爸爸爸爸」，而張丹峰一臉冧樣，亦有同老婆咬耳仔，記者上前想搵佢哋做訪問，洪欣就耍手擰頭：「唔好意思，唔做訪問，冇乜嘢，唔該晒。」而張丹峰喺隔籬猛話「唔該晒」，就行到Sogo後面一棟大廈搭𨋢上樓。
撰文：馮仁昭
洪欣囡囡入到兒童精品店就落地揀心頭好。