蔡卓妍（Sa）、周柏豪、鍾欣潼（阿嬌）噚晚8號風球支持宣傳電影《原諒他77次》首映，阿嬌有份演出亦都嚟撐場，不過為咗避談陳冠希誕女搞百日宴嘅事(新聞連結： http://bit.ly/2rgUyPG )，阿嬌甫抵現身即走到後台，拒絕接受傳媒訪問，只係喺台上回答司儀提問，被問戀愛點保鮮，阿嬌話：「同一間屋可以分開房，畀空間大家。」阿嬌又話自己絕對唔接受家暴，佢覺得因為有一次就會有第二次，就算真係愛，摑兩巴都接受唔到。

講到八號波都要做首映，柏豪話：「新人年代試過兩次首映同一次簽名會都係8號風球，頭先去salon整頭都係得我同化妝師，好似阻人收工咁。」

阿Sa就話自己貴人招風雨，曾經10號風球要出席Gucci活動，佢話工作人員冇保險，所以打俾Mani：「點知佢話嘉玲姐都去，咁既然係咁，我呢啲small potato冇理由唔出席啦！」之後阿Sa仲笑柏豪係 『周8號』。

本來好友容祖兒話唔嚟，點知又嚟咗，原因係佢拍嘅廣告8號風球取消，佢話：「之前我同阿Sa講我嚟唔到，後來嚟到，我就即刻自己化妝，呢單嘢又咁勞民傷財，相信大家來支持阿Sa呢件事都真係有真愛，打風都打唔甩，冇理由好姊妹都唔嚟支持！」