很喜歡IFC（國際金融中心），由開幕至今，差不多一有空就會去行番轉。
IFC很有「品」，用料好靚，很有氣派，冷氣很夠，商舖很精，很有空間感。City'super很好行，單是賣豆漿、豆腐的corner便設計得流水淙淙，Bakery更定時出爐新鮮pizza，十元八塊為味覺帶來很大幸福。PalaceIFC戲院是至愛，座位舒適，小食部賣的大碌腸及熱狗價廉味美，中午還有特價。附設的書店麻雀雖小，但往往能找到心頭好。咖啡店感覺悠閒，六十元一個下午茶餐，用的是精緻瓷器，一啖咖啡，一口西餅，看看來來往往的靚人，很快便一個下午。

畢加索也來了IFC。《巡遊》是畢少數的大型作品，差不多有掛在新世界中心外牆的那些大型宣傳海報那麼大。《巡遊》是畢較早期的作品，還沒有那麼「離譜」（離譜是一件好的事），睇得明，更可看見畫中畢加索自己畫自己，重攬住個女仔㖭。《巡遊》在過去50年中只曾公開展出10次，在亞洲首次展出，唔使錢，非常值得睇。如果需要「導賞」的話，請早排隊攞飛。導賞的意思是有位大俠帶住睇呢幅大嘢，一路睇一路解釋有咩咁好睇，不過其實現場有小冊子派發，揸住小冊子自己睇，一樣睇得明之餘重free啲，唔使限時間又唔使排隊。
《巡遊》係國寶級藝術品，懇請唔好有人搞搞震，人家咁慷慨借我哋欣賞，最緊要完整無缺還番畀人，否則人哋會當我哋香港人係野人。有埋畢加索，大條理由去IFC行吓嘞啩?!