韓國「國民初戀」秀智孖韓劇《W》男星李鍾碩主演嘅SBS新劇《當你沉睡時》，將於下周三首播，早前秀智為雜誌拍攝新相，同時大談新劇。

秀智表示：「拍攝完電視劇後我就去澳洲旅行，食咗好多美食，仲去睇野生企鵝！」之後秀智感慨地表示：「雖然好難，但我正努力唔去因為開心嘅事而過分喜悅，亦唔會因為悲傷嘅事情而過度難過，我於拍攝《當你沉睡時》時獲得好多慰藉。」

另外，秀智今日亦於Instagram公開新相，力谷新劇。

至於拍檔李鍾碩，拍完劇之後就忙於打理自己新開張嘅咖啡室「89mansion」。李鍾碩之前將位於新沙洞嘅別墅翻新，改造成咖啡室。日前李鍾碩就於Ig公開佢為咖啡室嘅牆寫字及種花嘅照片，非常用心地打理佢嘅新事業。