時間：91年

地點：無綫清水灣電視城

人物：萬梓良

經過：曾經拍過《大內群英》同《他來自江湖》等無數經典劇集嘅電視小生萬梓良（萬子），佢名聲同脾氣一樣咁響噹噹，係最早被指有躁狂症嘅藝人，而佢最經典同最令人深刻難忘嘅躁狂事件，實非91年寫血衣抗議莫屬！

不滿廠期不足

當日無綫喺清水灣電視城舉行一個綜藝節目記者會，當高層何麗全接受記者訪問期間，萬子突然着住件血衣經過，佢件衫上面用紅色油寫上「乞求雞毛司令賜廠期」等大字，在場班娛記梗係第一時間追住影相。萬子帶班記者遊咗幾個圈之後，走咗入去一廠化妝間，跟住佢師傅到咁對住化妝間裏面個神位，好大聲話：「天地有正氣，雜然賦流形……」原來佢念緊文天祥嘅正氣歌，萬子念完一段之後，就掉轉頭青筋暴現咁高舉雙手，然後冇做任何訪問就走人。
結果大家惟有好似金田一咁，靠佢件衫嘅蛛絲馬迹至解開個謎，原來萬子唔滿意監製唔夠廠期拍《大家族》，所以寫血衣抗議，搞到咁大件事，無綫班高層梗係作出安撫。
近年萬子淡出演藝界，喺內地做男裝生意，佢同恬妞96年離婚之後，01年同空姐郭明黎再婚，咁多年再冇聽到佢躁狂症發作，都算係可喜可賀。
本欄逢周一至周六刊出