去年頒錯獎的「雌雄大盜」華倫比提（Warren Beatty）與菲丹娜惠（Faye Dunaway）則回鍋雪恥，再度頒最佳影片。不過未知是否趕時間，或者怕佢哋講錯嘢，所以甫上台就宣佈入圍名單。華倫比提負責打開信封，而今次每個信封上都大大隻字印住所頒獎項名字，但華倫比提宣讀《忘形水》得獎後，仍不放心，將信封遞俾導演吉拿域戴拖路（Guillermo del Toro）睇一睇。

獲13項提名嘅《忘形水》（The Shape of Water）捧走最佳電影，吉拿域戴拖路帶領一眾台前幕後上台領獎，雖然事前佢被指抄襲《Let Me Hear You Whisper》同《妙不可言》（Delicatessen），成為阻礙捧獎嘅隱憂，不過最後仍然不負眾望，當然值得高興。

吉拿域戴拖路致辭時話：「史提芬史匹堡曾經同我講，如果你得獎，你應該感到驕傲。我呢一刻就真係好驕傲！特別想鼓勵年輕導演要追隨夢想。我以前喺墨西哥嘅時候都冇諗過自己會成功嘅！」女主角莎莉荷堅絲（Sally Hawkins）都在台上不停拭淚。

但當監製 J. Miles Dale想致謝辭時，現場已響起音樂，不讓他發言，現場發出少許噓聲。最後由Jimmy打圓場，問佢：「你想講乜嘢？我幫你講。」佢話：「我只係想多謝導演而已。」

至於頒獎禮一開始，Jimmy就話發言最短嘅得獎者，可獲水上電單車一部。最後架車由最佳服裝得主、《霓裳魅影》嘅Mark Bridges奪得。