憑韓劇《原來是美男》為人熟悉嘅男星張根碩，上月4號踏入30歲生日，而一眾粉絲為咗慶祝偶像生日，特地集資於首爾漢南洞嘅Blue Square Nemo Gallery舉辦相片展，展覽於噚日開始，一連舉行三日，粉絲於展覽會上展覽多張近年來張根碩出席活動、現身機場嘅相，真係充滿回憶。

而目前正忙於拍攝新片《人類的時間》嘅張根碩，今日亦特地抽空現身欣賞粉絲準備嘅展覽，吸引大批來自世界各地嘅粉絲喺烈日當空下等見偶像。身穿藍色恤衫配黑色褲嘅張根碩現身時心情大好，不停向粉絲揮手、派飛吻，引得粉絲尖叫聲不絕。