【20：55更新】肇事紅的司機接受訪問後，於紅磡被元朗警區刑事調查隊截獲，涉嫌刑事恐嚇被捕，警在的士上起出涉案鐵通

元朗前晚發生惡霸紅的司機擸鐵通趕客落車事件！《蘋果》找到肇事的紅的司機林先生，他透過電話簡單回應了事件，更一副受害人姿態，又反指被他趕落車的一男一女乘客是另有目的，是有人委派來對付他，「我俾人搞咗7、8年㗎喇」，他更理直氣壯說：「我又冇犯法，又冇刑事，……我真係好多怨氣呀！」說罷他繼續開工，游走旺角、紅磡一帶。

姓林紅的司機憶述，事發當晚他駕駛紅的入了元朗，由於未有上客，於是欲到「大棠逛一逛」。到達後，他剛停下車準備往買食物，突然對面馬路有一男一女截車，他們更揮手着他兜過對面，林先生心諗「以為佢哋出九龍」，誰知二人上車後，表示要到附近一個地方，「佢講咗個名出嚟！我話我唔識喎，咁佢話佢帶我路。」但林先生認為自己「唔熟路」難以溝通，更回應道：「你帶我路，咁都要講溝通得唔得㗎嘛，要有溝通嗰樣嘢嘛！」

其後，林先生以唔熟路着二人下車：「咁我話我唔載喇……唔唔唔係……我唔係話唔，我話不如你搭綠色果啲車吖，我呢架紅的嚟㗎，唔熟路㗎嘛！」但對方堅持要帶路，林先生續說：「我話要有溝通嗰樣嘢，溝通唔到會撞車㗎嘛！……我係咁叫佢搭綠色果啲，佢就話要報警喎，我一直俾啲人滋擾，嗰兩個人呢，我諗其中一個都係救護員果啲人嚟。」記者問「點解係救護員呢？」，他說：「佢個樣似吖嘛，又話報警，使唔使報警呀，係咪佢唔啱先？」

林先生在訪問過程中，講述的內容令人摸不着頭腦，又不斷說「我俾人搞左7、8年架喇，我話畀你聽，原本有廁沖變咗冇廁沖，仲有好多嘢㗎，我唔講得㗎！」又九唔搭八的說自己經常俾人跟蹤，又聲稱一名議員搵人跟蹤他，一時又救護員，一時又記者，一時又保安，很多人要對付他，又自言「我真係多怨氣」，但又拒絕講出自己的經歷，又表示未有警察接觸他。其後在紅磡被警方拘捕。

你敢爆，我敢獎！ 即Call《蘋果》24小時爆相爆片熱線 ：63836568