周日澳職季後賽上演另一場淘汰圈比賽，珀斯光輝憑中場迪亞高卡斯度同前鋒祖爾捷安尼斯各建一功，以2:0擊敗墨爾本城晉級，準決賽將面對常規賽冠軍FC悉尼，墨城出局最慘係老將卡希爾，37歲仲未贏到首個聯賽冠軍。
周日淘汰圈大戰，墨城成班後防派大膠紙，16分鐘中場迪亞高卡斯度左路窄位扭埋大位近射得手，幫光輝先開紀錄，係就係好好波，不過墨城當時禁區內都有幾個後衞，不過都係得個睇字，又唔逼又唔搶，眼光光睇住對手射波，墨城亦都似乎冇吸收教訓，30分鐘就輪到客軍前鋒祖爾捷安尼斯右路禁區推埋大位射入，墨城後防都係盯得唔夠緊，真係抵輸。

光輝四強鬥悉尼

下半場墨城圍攻，可惜腳頭無靈，前鋒卡希爾、科拿路利都失機，光輝最後力保清白身下， 以2:0勝出；可憐卡希爾今季由中超杭州轉投墨爾本城，諗住可以衣錦榮歸兼贏番次聯賽冠軍，不過就係班豬隊友累事，墨城出局後，37歲嘅卡希爾要追求首次聯賽冠軍夢就至少踢多一屆。
光輝晉級之後，澳職季後賽四強亦都誕生，上周五互射12碼淘汰西悉嘅獅吼，因為常規賽排名較名，將會作客常規賽亞軍墨爾本勝利，常規賽冠軍FC悉尼，就會主場對光輝，角逐決賽資格。