當年今日
關於我們

【好戲之人】敖嘉年自覺外形唔討好感自卑 望化解與冼灝英10年積怨

蘋果日報 2020/03/17 00:30

無綫敖嘉年冼灝英排骨仔城市追擊

大台爆離巢潮,43歲的敖嘉年是其中一個,拍完《伙記辦大事》便宣佈離開工作22年的TVB。決意離開,敖嘉年沒有半句怨言:「公司都想我4月開劇,但我接咗個舞台劇,仲有電影要拍,真係拍唔到,睇吓未來再以咩形式合作,公司好錫我,話延遲一年再搵我。明白有啲同事工作量少啲,每個人際遇唔同,呢行真係努力未必有回報,見過好多好勤力嘅演員,但冇運都係鬱鬱不得志,我算好幸運,年年爆騷,工作量都OK。」
演員最怕角色被定型,敖嘉年就有機會嘗試不同角色,扮智障人士、江湖大佬、邪教教主等都拿捏得很到位。他曾經是前無綫金牌監製李添勝的御用演員,但令人印象最深刻的演出,並不是做男主角的《新抱喜相逢》,而是添哥執導的《巾幗梟雄》系列,先是演敗家仔蔣必文,為他贏得「飛躍進步男藝員」,在續集演經常被欺負的「排骨仔」,亦獲提名男配角的最後五強。敖嘉年笑說:「個個都想做男主角,但際遇問題,未到你咪安守本份做好自己角色。個個都講排骨仔,冇諗過出嚟效果咁犀利,播咗3集之後,已經有前輩喺西餐廳同我講『你從今之後唔同晒㗎嘞』,Ben哥哥(黃賢智)同有啲幕後導演監製都嚟恭喜我。」
敖嘉年中五畢業後做過電台DJ,在1998年加入無綫成為合約藝員,由《城市追擊》主持開始,但剛出道便遭前輩挖苦打擊自信:「入去《城追》第一個月,已經有前輩話『o靚仔,你咁嘅衰樣,今年如果冇咩特別就唔好做嘞』,心諗我唔係好差啫,有諗過係咪簽埋呢年就唔簽。」打擊亦不止一次,他續說:「好多年前,試過同屋企人去商場,咁啱經過有幾位清潔阿姐食嘢,好大聲話『嗰個咩茄喱啡嚟之嘛』,嘩,屋企人又火爆,我話『算喇算喇,我哋走』,佢哋講完舒服啲?或者係無意,但好深刻留喺我個心度,好唔開心。」他自言性格自卑,經常萌生退出念頭,他苦笑說:「我噚晚都有諗(唔做)……其實我係一個好自卑嘅人,唔靚仔、唔高大,外形又唔夠討好,到而家都唔係太敢睇自己嘅演出,成日覺得做得差同醜怪,我都知唔係太好。曾經有個堪輿學家朋友同我講『你情緒起伏好大』,叫我小心,但亦因為咁,先可以演到唔同嘅角色,要學懂控制。」
除靠外形,做演員更重要是實力!敖嘉年沒有接受過正規的演戲訓練,自言演技是靠時日磨練,但他自幼受父親薰陶學習南派功夫,有助演武打戲份;而他天生擁有一把靚聲,至今仍有做幕後配音工作,還有到各地登台搵真銀,近年更登上大銀幕拍攝電影《盜墓筆記》、《葉問》系列等,機會不絕。他說:「阿爸要我學功夫,幼稚園4、5歲放學就要練習扎馬,家姐唔使,哈哈,大啲就打套路。中學打跆拳道,自己鍾意北派功夫,後來跟陳觀泰拜師入咗大聖劈掛門。」
談起拜師,令人勾起10年前敖嘉年與冼灝英的一段恩怨。當年有指敖嘉年口頭上稱冼做師父,後拜陳觀泰為師,引起冼師父不滿,被他借醉打爆左眼眉骨,一度要報警。敖嘉年亦大方談舊事:「睇番件事,自己都做得唔啱,人頭豬腦,講說話又唔識,好多嘢處理得唔好,造就各樣誤會。大家都有唔同問題,唔能夠只怪人(被打),係自己做得唔啱先。」他表示與冼灝英曾在工作上碰面:「做嘢撞到都有打招呼,咁耐喇。世界好無常,何必放在心,帶落棺材咩,自己做得唔好,有機會有緣,大家傾番偈,真係冇所謂。」
嘉年最避忌,反而是談結婚4年的圈外太太Betty,他直言太太不喜歡,而二人合作開設的廣告公司,在疫情下生意仍可維持。問到有沒有考慮生BB?他斬釘截鐵說:「阿媽都叫我唔好生,哈哈。社會咁辛苦,湊一個小朋友都好大壓力,呢個年代冇乜所謂,最重要自己家人開心就OK。」
採訪:嵐山
攝影:沈健程
攝錄:馮嘉銘
髮型: Alva @ HAiR
化妝: Rigel Ng @ Rigel Beauty Art
場地提供:體藝會
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
empty
攝影:沈健程 右:電視截圖
empty
敖嘉年自幼習武,特別喜歡北派功夫。
empty
敖嘉年自謙不夠高大、靚仔,但不怕被鬧及不斷向前輩發問,用時日磨練演技。
empty
敖嘉年望化解與冼灝英的恩怨,自認處理得不夠好。
empty
喜歡收藏兵器
empty
嘉年自覺外形不討好,自幼已經好自卑。(受訪者提供)
empty
爸爸學南派功夫,嘉年自幼亦受父親薰陶。 (受訪者提供)
empty
(受訪者提供)
empty
一家四口(受訪者提供)
empty
敖嘉年笑言媽媽都叫他不要生仔 (受訪者提供)
empty
敖嘉年4年前低調與圈外女友Betty結婚(資料圖片)
empty
《巾幗梟雄》的敗家仔必文,令敖嘉年成功上位,不是主角都好有戲。(無綫電視截圖)
empty
《巾幗2》飾演排骨仔,經常被人蝦。 (無綫電視截圖)
empty
敖嘉年的喊戲,張張都是潛力圖。(無綫電視截圖)
empty
與好戲之人黃秋生對戲(IG圖片)
empty
敖嘉年在《仁心解碼》單元中,飾演邪教「靈心會」教主活聖阮文浩,掀起過一陣熱潮。(無綫電視截圖)
empty
李添勝可說是敖嘉年的伯樂(資料圖片)
empty
敖嘉年幾年前已棄做無綫「親生仔」,往外發展,有機會拍大陸電影《真假鐵馬騮》做男主角。(IG圖片)
empty
去年拍大陸電影《盜墓筆記》,打開了大陸市場。(IG圖片)
empty
10年前與冼灝英因「師徒」之名積怨(資料圖片)
empty
當年敖嘉年被冼灝英打爆左眼眉骨(資料圖片)