工黨前立法會議員何秀蘭昨指,至今只有特首參選人胡國興在政綱提標準工時,曾俊華只講合約工時,林鄭則最詭異,「冇政綱都可以攞到咁多提名」。何質疑工商界在林鄭未有政綱即提名,「唔知佢哋關埋門傾咗啲乜」。何又批評建制派勞工界選委,尤其工聯會等,至今未有要求參選人交代勞工政策,「佢哋係絕對對唔住基層勞工」。
工黨立法會議員張超雄昨則狠批林鄭曾掌管整個全民退保進程,但手段卑鄙過人,面對周永新教授交出全民退保研究結果後,「林鄭唔鍾意,就否決周教授研究」,到新顧問報告指大部份民意支持全民退保,林鄭亦拒接受,最終方案四不像。張又指曾俊華、葉劉淑儀對全民退保亦欠缺政綱,胡國興的方案亦非全民退保,提出要先作資產審查,故就全民退保立場,「冇一個候選人工黨係滿意」。
■記者林俊謙