麥潔文與女兒天天、CAllStar及應屆港姐季軍郭嘉文，今日喺西貢出席港台活動，麥潔文被問到如何同囡囡維繫要好感情？佢笑言：「都係食飯、瞓覺、打鬧囉!我哋係用朋友方式相處，間唔中會鬧下交，但好快就冇事。」講到特首梁振英女兒梁齊昕掌摑媽咪事件，天天即話：「我梗係唔會做呢啲啦！我哋係打情罵俏。」

同場嘅CAllStar就話佢哋平日甚少喺香港行山，但好希望可以野生捕獲周潤發，故希望大家可以提供路線圖。此外，有傳應屆港姐冠軍麥明詩及亞軍龐卓欣唔會同無綫簽約，郭嘉文僅透露自己已經同無綫簽咗合約。