歐聯決賽禮拜六晚喺卡迪夫舉行，而喺禮拜五，歐洲足協就喺卡迪夫舉行咗場名宿六人賽，由古列治明星隊對布達堅奴明星隊，兩隊加埋有24個球員贏過歐聯冠軍！論贏過歐聯冠軍嘅數目，呢場六人賽嘅名宿肯定勁過周六歐聯決賽班球員。

歐洲足協喺卡迪夫灣整咗個大型浮台，上面起咗個球場。古列治明星隊呢場着白衫，成員包括卡富、史坦高域、皮利斯、迪西里、魯殊、傑斯、查斯古特、艾比度同馬特拉斯等球員，至於布達堅奴明星隊着藍衫，入面有沙加度、費高、巴巴耶路、卡路士、文迪達、米積杜域、蘇加、路爾斯加西亞、施多夫、卡林保、麥馬拿文、迪高同古莊臣等。如果你識得晒呢班球員，相信都有番咁上下波齡。除咗足球壇名宿之外，兩隊都邀請啲其他界別人仕，例如花式足球同籃球員，籃球員有NBA球星安東尼同埋艾比迪。最後，兩隊炮製咗30個入球，古列治明星隊贏咗18:12。