徐小鳳嘅第四晚紅館個唱，邀得任賢齊（小齊）做嘉賓，小齊出場時本來想同小鳳姐嚟個「愛的抱抱」，但因為小鳳姐裙尾又闊又長，令佢無從入手，小鳳姐見狀笑言：「你可以踩我條尾，第二個就唔得，你一定得！」

之後佢又叫小齊講廣東話，小齊則自爆瘀事：「我每次同人講『大家好，我係任人砌』，講完都淨係聽到大家狂笑。」

另外，安哥時盧海鵬扮「徐大鳳」現身，小鳳姐見到佢就話：「嘩！鵬哥，你越嚟越靚！做乜一晚比一晚勁！」小齊獻花時，見到鵬哥都忍唔住問：「江湖傳聞話盧海鵬試咪，全部人都要暈低，我未聽過，到底係點？」

鵬哥聽後狂笑話：「你唔係夠膽喺小鳳姐個騷，叫我搞啲咁嘅嘢啊！」之後齊齊將鵬哥試咪金句改成：「盧海鵬試咪，徐小鳳最威！」爆笑全場﹗