每個人都有缺點,所以有缺點不是罪。自己有缺點卻不承認或者不知道自己有缺點,那就肯定是十惡不赦的大罪。有個朋友,最近老是不開心,問她原因,她說因為上司EQ好低。
「EQ低嘅人,通常都好聰明嘅,你喺佢身上學到嘢咪得囉,人邊會有完美。」我安慰她說。至弊佢EQ零蛋,又唔見得IQ爆棚,講嘢詞不達意,做嘢又冇諗頭,我都唔知公司請佢返嚟做乜,她眉頭緊皺地訴著苦。雖然我唔認識佢上司,但係都感受到佢嘅淒涼。
專欄作家王迪詩有句名言,就是「甲組腳穿迷你裙」,意思係話人自暴其短。點解世界上有啲人咁蠢,自己對腳咁粗,都要着迷你裙?好簡單,因為佢哋根本唔知自己對腳粗。就正如我朋友嘅上司一樣,佢以為自己平時同啲同事嘻嘻哈哈,有講有笑,就覺得自己面面俱圓,好識做人。
平時同人有講有笑,都只係基本禮儀。但出嚟社會做嘢,純粹有禮儀根本完全唔夠。講真,禮儀呢啲嘢,小學生都識啦。出嚟做嘢,最緊要唔係禮儀,係修養。禮儀有得學,修養冇得學,只可以培養。點樣培養?係從細培養,人哋成日話家教家教,就係呢個道理。
朋友話,佢上司可以開開吓會,聽到乜嘢唔順耳,就大聲拍枱鬧人。喂,你話如果你係老細,莫講話拍枱,就算炸咗張枱都仲得啦。最搞笑係,佢又唔係老細,仲要喺老細面前拍枱,呢啲人真係人辦中嘅人辦。
喺一個公司會議,用拍枱呢啲咁野蠻嘅方式表達自己不滿嘅人,唔係冇禮貌咁簡單,係冇家教。掛住講人生道理,差啲唔記得講英文。禮儀英文係manners,修養呢啲咁難掌握嘅嘢,個英文字當然都難啲,係etiquette。
魏徵
酷愛英文,劉家傑是永遠偶像,幾乎背得出當年《英語一分鐘》的每集內容。
facebook: http://on.fb.me/1LqSCSV
電郵:
[email protected](《英文本色》專欄逢周三及周日網上刊出)