甫自馬來西亞返港嘅張永霖,噚日出席聯通股東特別大會;因為要等點票結果,自然就搵佢吹吓水。身兼港大專業進修學院董事局主席嘅佢話,發覺自從回歸後講英文嘅機會少咗,大家向前望同時亦唔應該忘記歷史,所謂「前事不忘,後事之師」。佢自認英文水平都唔錯,但為免日久生疏,所以每日都會抽五分鐘朗誦吓英文。
張永霖又建議大家盡量爭取時間多讀書,佢近期翻睇大學時代教科書《EuropeSinceNapoleon》,作者係DavidThomson;中文書就睇緊高陽嘅歷史小說《燈火樓台》,佢話緊張過睇武俠小說,至於對從未睇過高陽作品的讀者,佢就建議先從《紅頂商人胡雪巖》及《曹雪芹別傳》入手。
至於聖誕同新年願望,佢話:「希望香港唔好咁貧富懸殊,唔好咁多階級鬥爭。」此時,有聯通小股東插口問:「張生,你重有冇電盈股份呀?」呢位電盈前副主席話:「最近收到電盈幾百蚊股息,先至知重有幾千至兩萬股囉。」
(圖)張永霖(右)笑笑口話,近排收到電盈幾百蚊股息,先至知道自己重有幾千至兩萬股。梁鑑章攝
傳真︰2623-9278
電郵︰
[email protected]