現年26歲嘅韓國「馬舞女」泫雅，上月被爆撻着同門師弟團PENTAGON嘅24歲成員E'Dawn，兩人所屬嘅CUBE事務所否認戀情後，泫雅反口認已經拍拖兩年，激嬲事務所，E'Dawn隨即雪藏，上周CUBE事務所更突然宣佈解僱泫雅及E'Dawn，將兩人踢出公司，引起熱議。

泫雅及E'Dawn被解僱後，立即影響CUBE嘅股價，一度急跌咗9.76%。CUBE嘅大股東隨即表示唔希望直接踢走泫雅及E'Dawn，但事務所就持相反立場，最終反口稱要透過理事會議去討論兩人嘅去留問題。

泫雅連日來都保持沉默，但噚晚卻傳出泫雅疑似簽約新公司嘅消息。事關泫雅嘅造型師噚日上載咗一張AOMG公司嘅卡片到Instagram限時動態，並寫住「好好做喇」，疑似透露將喺新公司工作。對此，有網民推測泫雅簽約到AOMG公司，造型師就與泫雅共同進退，一齊加入新公司，不過亦有網民猜測，只係造型師簽咗AOMG，與泫雅無關，勸粉絲唔好胡亂猜測。而目前泫雅、CUBE事務所、AOMG方面都未有回應。

AOMG係男團2PM前成員朴宰范創立嘅音樂公司，以Hip Hop為主要音樂風格，旗下有Simon D、Gray、Loco、禹元材等多名Rapper。

精選韓流，喺晒《娛果》
http://fb.com/appledailyent