每年年尾都有好多人結婚，娛樂圈有黃曉明與Angelababy打埋天窗，財經界都有喜事，61歲嘅細價股玩家、中南證券話事人莊友堅(Eugene)將於下周二(13日)，跟拍拖14年嘅維他奶(345)家族後人羅琪茵(Karen)喺意大利羅馬舉行婚禮。

莊友堅結婚呢單消息，都幾震撼財經界，市場一直知道佢同羅琪茵拍拖多年，不過莊友堅5年前接受雜誌訪問時自爆，自己曾經喺37歲時結婚，但婚姻只維持一年多就告終，之後佢同過前亞姐陳奕詩拍拖。

佢當時提到，雖然已經同羅琪茵拍拖多年，但無意結婚，指自己唔適合婚姻生活，感覺似被人綁住咁話。

近年亦不時傳出一啲關於莊友堅嘅緋聞，傳得最多就係前藝人陳文媛(BoBo)，不過有接近莊友堅嘅消息人士就話「BoBo其實唔關事」。

詳情請留意明天「中環在線」

相片來源:壹週刊

掌握財經生活資訊，即Like「蘋果ATM」fb專頁啦！
http://fb.com/appledailyatm