憑演出經典韓劇《天國的階梯》「泰華哥」一角而為人熟悉嘅49歲男星申鉉濬，今日被韓媒公開佢見義勇為嘅舉動，引起網民關注。

據報道指，申鉉濬今早揸車與大肚老婆外出，經過首爾清潭洞大街附近時，恰巧目擊車禍，一名女子被卡車迎面撞到，目擊事故嘅路人都嚇到不知所措。申鉉濬隨即停車，落車奔跑過去攙扶受害女子及報警叫救護車。報道引述目擊者發言指，卡車司機及女子似乎都嚇親，申鉉濬就一直喺旁邊安撫兩人嘅情緒，直到救護車及警察到場先離開。

隨後申鉉濬受訪時謙虛表示：「呢個唔係值得受到稱讚嘅事，而係理所當然要幫忙。」續指：「好彩近日正演出節目《鄉鎮警察》，有接受危機應對嘅訓練，先可以冷靜處理事件，受傷女子冇事就得。」獲大批網民留言大讚：「好溫暖」、「真係形象好好嘅演員」等。

更多韓流，喺晒《娛果》
http://fb.com/appledailyent