【韓流】22歲秀智披婚紗影封面 想預知未來為咗...
秀智李敏鎬
現年22歲嘅韓國「國民初戀」秀智近日為雜誌《HIGHCUT》拍攝封面,佢先後換上多套服飾,當中包括類似婚紗嘅服飾,着上充滿青春氣色婚紗嘅秀智十分迷人,唔知0依家服緊兵役嘅男友李敏鎬見到會唔會讚不絕口呢?
近日秀智忙於同李鍾碩拍攝《當你沉睡時》,新劇將於9月播出,提到劇中與朴惠蓮編劇隔咗六年再次合作,秀智話當初拍《星夢高飛》自己仲年紀好細,亦都好怕醜,同編劇唔係太親近,直到今次再次同編劇合作,佢直言心情好奇妙,佢話:「那時我仲係新人,但0依家唔係,編劇因為信任我先再次搵我,所以我嘅責任感就更加大。」
對於《當你沉睡時》中嘅角色,秀智覺得比起去年嘅《任意依戀》中嘅角色,新劇角色會更加女性化,令到佢日常生活亦無形中變得更加有女人味。由於新劇角色能通過夢境預知未來,問到秀智想唔想有呢個能力,從而改變未來,佢就話:「我到0依家為止所做嘅決定都唔係太滿意,亦都會有想後悔等我重新選擇嘅時刻,但從另一角度嚟睇又會好似好攰咁,因為平時唔理結果點,我都會諗住呢次係我一個決定,唔好再諗太多。」不過秀智就笑言如果佢真係有呢個預知未來嘅能力,佢就最好奇新劇嘅收視成績如何。