到目前為止，廸士尼樂園來港之旅對美籍嘅洋鼠米奇同洋鴨Donald仍然水土不服，飲食唔正常，久不久就見暈，唔知係前者發鼠瘟定後者染禽流感，總之硬係同香港八字唔夾，簡直有條件做負面新聞之星、黑仔之霸。由開舖至今，鑊鑊杰、單單甘，餐餐犯眾憎，至叻就係做到近期嘅nonewsisgoodnews，喺業績又冇起色嘅情況下，掌管推廣營銷嘅marketing高層領導梗係罪該萬死死無全屍啦！
話說自樂園「孖屐停」前頭領RoyTanHardy去年4月辭職唔撈執咗包袱之後，呢個四煞位一直懸空至今。梗係啦，邊個有自殺傾向嘅會想坐呢個千夫所鋤專食毒箭嘅位先！樂園入場/入住率關佢事、銷售達標又佢負責、公關形象廣告推廣產品發展消息發布企業傳訊分銷定價事無大小頭暈身㷫流淡汗生暗瘡乜都係佢孭，條數狼過大耳窿！點頂！當年福布斯有關廸士尼在港不濟嘅報道，都係要RoyTanHardy呢個位出嚟做人肉盾牌扮冇事頂住，相信呢個職位張凳一定係後現代鑊形設計先得。
如今，卒之有死士接棒喇，名喚JillEsparino嘅新豬肉相信下月會由花旗空運抵港上馬廸士尼樂園SeniorVP-Marketing一職，希望換過個由總部調嚟嘅女巫師變法，樂園新流年會好啲啦！睇吓點！