【新增動新聞】
所謂江山易改，本性難移，般尼中場祖爾巴頓自從一月獲領隊戴治收留後，喺中場助攻助守，仲以為佢修心養性打好波，點知周六英足盃爆冷輸畀非聯賽球隊林肯城場波，壞孩子本色又返晒嚟。呢位34歲中場喺下半場一次死球嗰陣「路過」本身喺工廠打工嘅林肯城前鋒馬特列特（Matt Rhead）身邊，然後自己掩面倒地扮晒俾列特鋤咗一踭，可惜演技屎到球證並冇理佢。

撩是鬥非本來係家常便飯，最弊係巴頓俾網民翻舊賬，發現佢4年前發過推文表示：「嗰啲冇人掂到佢就『典床典蓆』嘅球員應該要追加停賽，我討厭騙子，當局應該正視吓。」當時做正義聯盟做得咁過癮，巴頓賽後即刻喺twitter補鑊，話唔係有心扮嘢令列特被逐，有身體接觸好平常喎。