特首選舉團隊玩弄文字藝術玩出禍，將「I'llgetthejobdone」譯做「我會做好呢份工」，引來劣評如潮。所以話，文字真係好值錢㗎，上市公司通告尤其如是。
建星環保（8011）上星期復牌披露增持汶萊油田權益，以及改名做百田石油。根據英文通告版本，建星係取得汶萊西部劃為M區區域「theexplorationrights」，中文通告譯作勘探權。通告一出，股價即刻碌返落去，因為勘探權同開採權分別好大，以國內準則為例，擁有勘探權不一定就會有開採權，雖然好多時勘探出金屬礦或油礦後，都會有埋優先開採權。
勘探只係開發油田過程中嘅一小部份，開採同埋銷售先至賺到大錢，奇就奇在通告有埋成個油田儲量同埋合理估值，淨係有勘探權無理由要咁詳細做估值。其實英文通告係咪應該係explorationandexploitationrights，即係勘探及開發權呢？如果真係有開採權，唔該公司快啲澄清，呢樣嘢對股價好重要。
呢單嘢令歐陽風諗起中盈控股（766）。去年中盈發出通告，話擁有印尼嘅瀝青油礦項目「採礦權」，原來只係「手民之誤」，正確應係合營公司獲授該項目之一般「勘探礦權」，而未獲授該項目之任何「採礦權」，真係差之毫釐，謬之千里。

近期當炒嘅股票，除農業股外，就係林業股，因為兩隻相關股排隊上市，滙源果汁本周招股，三林環球則於農曆年後。香港上市林業股中，前稱金威嘅中國林大（910）股價至為強勁，舊年今日股價0.186元，昨收1.28元。睇到佢咁勁，宏昌投資（061）都去轉型搞種植業務，噚日朝股價異動，中午即刻發咗份通告，重申之前公布收購農業商外，不悉股價異動原因。睇嚟股仔繼採礦同水務之後，回歸「田園」係下一個轉型概念。
歐陽風