近排發展商推新盤個心都好雄，尤其係啲特色單位，意向價位愈推愈高，好似完全唔憂賣咁款，無論港九新界樓盤，只要望到海，叫價每呎都去到一萬蚊或以上，佢哋真係信心爆晒燈。
之前有馬灣珀麗灣三期、土瓜灣農圃道18號頂層，然後深井碧堤半島二期，都話特色單位要成萬蚊一呎，噚日華懋馬鞍山迎濤灣，都加入呎價萬元樓行列。
華懋售樓部經理吳崇武話，下個禮拜推出頂層相連單位，兩幢一共六個，由1353至2019方呎，叫價去到一萬蚊一呎，比起最貴嘅分層單位，足足貴一倍。
另一個港島區樓盤，恒基北角御皇臺，複式叫價就要萬五蚊，比起早排薄扶林貝沙灣南灣，呎價破萬嘅水位重要高一啲。

珀麗二重天可以入票
今年焦點樓盤之一，馬灣珀麗灣三期，新地攞到售樓紙後，蓄勢開賣。
雖然負責銷售嘅新地代理執行董事雷霆話，先推出嘅「珀麗二重天」，最快月底至下月賣，不過，噚日市場就收到消息，話有興趣買呢類千三至千四呎「珀麗二重天」單位，可即時入票，每張本票二十萬元。
平時，中小型新盤收本票，普遍五萬至十萬，今次新地收取二十萬做大單位本票，唔通象徵賣價會一樣咁高？
聽講，發展商即時接受準買家出價洽購，好似話至少八千蚊一呎。