哥連拿臨急抱佛腳
光頭球證哥連拿可以話將佢聲譽押注響阿根廷對英格蘭場波。佢最近惡補兩隊波嘅踢法同戰術，希望幫到佢到時執法。無計啦，鬼叫佢響上季意甲有幾次爭議性執法咩。不過講時講，我求大俠奉勸光頭佬咪咁太過緊張，一句講晒：做球證淡定有錢剩。
費高攰 想退休？
費高雖然三十歲都未到，但已經開始諗退休問題。其實，我求大俠就好明白佢點解有咁嘅諗法，事關好似佢咁一季踢成四、五十場波，身心都會好攰；況且佢又有頭家，梗係想抽多啲時間陪老婆同個女啦！
非洲巫醫真係靈！
有傳話非洲啲巫醫最鍾意喺場邊搞搞震，施法幫自己隊球隊贏波。唔知啱啱剪短咗頭髮嘅法國中場比堤係咪中咗「法」，如果唔係點會喺禁區度雞手鴨腳，間接造就塞內加爾喺上半場先開紀錄，領放返終點。
韋拉要搵親生老竇
唔講你唔知，原來祖籍塞內加爾嘅法國中場韋拉，一直唔知自己親生老竇係邊個，所以佢打算喺世界盃之後，返塞內加爾搵老竇。不過，韋拉咁專業，球迷唔使驚佢會因呢件事而影響喺世界盃嘅表現。