韓國「國民初戀」秀智早前落實拍攝SBS新劇《浪客行》，與男星李昇基繼《九家之書》後隔5年再合作，據悉劇組已經喺大前日進行劇本閱讀。《浪客行》以100%事前製作，預計明年3至4月開播，而劇集製作費高達250億韓圜（約1.82億港元），所以劇組亦揼本將赴葡萄牙、摩洛哥等海外地方拍攝，令粉絲相當期待。至於劇集嘅海外發行由Sony影業擔任，有望喺美國、日本、韓國三國同步播出。

秀智將飾演國情院要員高海麗，係海軍陸戰隊中校高強哲嘅女兒，父親離世後就擔起家庭生活嘅重擔，進入國情院做7級公務員；李昇基就飾演以成龍為人生偶像嘅動作替身演員車建，係一個識跆拳道、巴西柔術、柔道、劍道、拳擊等綜合武術18段嘅高手，係業界冉冉升起嘅新星。車建因飛機墜毀失去姪仔，得悉係恐怖分子所為，進而捲入神秘事件。

另外，秀智早前為雜誌《ELLE》拍攝嘅新相於今日公開，相中秀智換上唔同服飾，包括女人味十足嘅長裙禮服、充滿少女味嘅露臍短上衣等，相當性感。隨後受訪時秀智提到自己馬不停蹄地工作：「冇特別嘅休息時間，Keep住做嘢所以時間亦不知不覺咁過去。雖然都有結果未能達到期待值嘅時候，亦覺得我做嘅嘢並唔會100%完美，所以會當做一個學習嘅過程。」

更多韓流，喺晒《娛果》
http://fb.com/appledailyent