曾演出韓劇《主君的太陽》嘅38歲女星鄭佳恩本人1月陀住B嫁圈外人，上月20號就透過所屬事務所宣佈誕下B囡，升呢做媽咪。初為人母鄭佳恩都相當開心，Keep住喺Instagram上載囡囡嘅相，睇嚟相當幸福。不過噚日佢上載一張自己餵緊母乳嘅自拍照到Ig後就引起爭議。

鄭佳恩上載自拍照同時寫道：「依家可以邊餵母乳邊自拍。」表達自己餵母乳嘅技巧越嚟越好，又講笑咁話囡囡好識做，用身體遮住要遮嘅部位。

不過網民見到呢張相後意見就相當兩極，大部分網民都力撐鄭佳恩，反斥戴住有色眼鏡嘅人先會覺得有問題，又指為人母親係一件好偉大嘅事，更大讚張相影得好靚，不過就有網民指鄭佳恩露得太多，又斥鄭佳恩想藉此引人意注，亦有部分網民指鄭佳恩餵母乳冇問題，但唔應該咁公開放到網上分享。