堂堂一代法國名將，巫斯義1月未盡全力策騎賢廐「精彩鬥士」，被重罰停賽15個賽日，上訴又失敗，復出後久未建功，一肚鬱悶，但佢唔甘於捱打，今晚卒之打破停賽復出後悶局，第七場贏完馬大聲一嗌，一吐鬱悶之氣。
此場三班一哩，東廐「牛精仔」後上衝贏「君悅灣」，17倍建功，阿巫取得自5月13號復出以來第一win，「牛精」系馬主王永強守齋大半季，亦告今季首次揚威凱旋門，同樣苦盡甘來。
今場由頭到尾都係方廐「贏到爆」最熱，不過此駒跑落乏善足陳，最終只得第五。反為阿巫策騎「牛精仔」拉士出盡九牛二虎之力，及時追過「君悅灣」，後駒唔好彩輸衝線嗰步，連捷唔到屈居亞軍。第三名由「信是有緣」後上拎到。
全場有三駒落飛着綠或啡燈，結果「金領宙」得第四叫最叻，其餘「智者」同「凱倫之寶」都冇影。