祥泰地產（199）呢期緊貼5月以嚟嘅下降軌前，將破未破，要昅到實一實。
祥泰地產喺8月到9月期間，所發嘅企業資訊，幾乎清一色係公司回購，但股價唔聽使，仲要插到10月頭先止跌回穩。
要咁睇，祥泰地產發展馬交地產，一直只聞樓梯響，又無實際動作，隻股成日就亁炒牛河。但喺上月中，集團就話投資路環住宅項目（25%），首期150萬平方呎項目，將喺明春推售。計計數，當首期每方呎係咁意賺500蚊，祥泰地產潛在利潤可賺1.8億銀，馬交項目唔再止於煲水，對股價有實際支持。再講，祥泰地產呢期回升，現價（0.415元）同公司回購價差無幾，兼且同CN換股價（分別0.44元及0.7元）有好大距離，呢轉入市，邊行邊睇，首站目標係NAV0.56元，潛在回報率35%，大牛市中，算係碎料。

航空股獨漏新數碼

呢期航空股全部炒上，獨漏新數碼（276）。新數碼上年開始轉型，由虛擬世界重返現實，拓展富貴私人飛機業，兼且聯同深圳航空及國民信託合組企業，提供包機及飛機管理服務。
要咁睇，新數碼掌舵係魯連城，各界關係網絡良好，呢轉搞嘅係富貴航空業，夥伴兼且又係深圳航空，管理層有睇頭。又港股做咗狂牛，股仔一破關，會升到你唔信。純走勢，新數碼最近3年大型密集區喺0.25元，期待突破，可以翔空萬里。
錢雋