人稱民望高嘅食衞局長高永文，之前喺一場「歡樂跑」賽事俾小朋友絆倒，額頭、顴骨、嘴唇都傷晒，有啲位仲要縫針㖭，八方嗰日見到佢血流披面，一啲都唔歡樂，個心仲離一離咯。佢唞咗兩個禮拜之後，噚日終於復工，雖然塊面有啲傷口仲一撻撻，未完全回復昔日斯文靚仔樣，但精神都唔錯，可以開開心心過聖誕咯。
休息咗一輪嘅民望高，精神面貌好番好多，噚日企定定畀八方任影唔嬲。雖然右邊面仲係有啲傷，額、眼皮、顴骨仲係有痕，鼻骨頂有撻痂，但左邊面依舊好滑溜。民望高話要多謝當日歡樂跑嘅主辦單位、聖約翰救傷隊同北區醫院人員嘅悉心照料，先好得咁快，仲話自己休養期間，都好關心時事㗎。