許冠傑(Sam)一連三晚喺紅館舉行嘅演唱會，噚晚尾場，Sam哥繼續錫粉絲同嘉賓，不停派肉嘴，全晚送咗19次。演唱會嘉賓有古巨基、J.Arie、糖妹、陳凱彤、徒弟Justin，當然唔少得大哥許冠文(Michael)棟篤笑，仲有兩個囝囝懷欣、懷谷一齊Jam歌。

當Sam哥全晚不停周圍同fans握手時，有份做捧場客嘅夏蕙BB，就捧住個金帆船，想送畀Sam哥，不過Sam哥行咗好多次都冇收，到第5次最終都收咗，而另一pair觀眾白姐姐同謝偉俊，就幸運得多，白姐姐得到Sam哥送豹紋絲巾同錫面珠一啖。

Michael上台做棟篤笑時，Sam哥先恭喜佢得到金馬獎影帝，Michael即刻糾正：「我唔係得咗，係提名啫！其實呢個影帝應該係阿Sam攞，佢好戲過我好多，如果佢o依家肯繼續同我拍電影，影神都攞埋啦!你哋(觀眾)幫手叫佢同我合作拍多幾部新電影，我希望可以合作拍《新摩登保鑣》。」

至於基仔就着住豹紋西裝，同Sam合唱完《沉默是金》之後，就話：「我特登準備呢套衫，因為見你嘅fans都特登著豹紋，見我呢身打扮都知我係超級fans啦!」之後大會想用射燈照住基仔父母，外父外母同老婆，基仔即搞笑話：「唔使畀spotlight，佢哋自己會發光。」跟住佢又繼續同Sam哥講：「嗰日見到你張海報，我同太太講『正呀，Sam哥參選特首』但我太太話嗰張係演唱會海報，如果Sam哥參加特首，我嗰票實投俾你。Sam哥為香港人創造好多好歌，啲歌詞學校應該用嚟做課文，就算佢唔選，仍然係我哋心中嘅特首，特別係我哋嘅精神首領。」

完騷之後，Sam哥同一班嘉賓喺後台做祝酒儀式，陳凱彤話大半個月前知道做嘉賓，就每日不停聽住要合唱嘅歌。講到Sam不停送肉嘴，佢話都有少少尷尬，但都知係禮貌。

Sam哥就話做完三場騷，覺得好好玩，每晚都唔同嘉賓，fans又熱情，嚟緊會去三藩市、多倫多登台。至於譚校長話想合作，Sam哥話：「會一齊合作幾首歌，佢唱我嘅歌，我唱下佢嘅歌，crossover。」問到3晚不停錫粉絲，揀人錫有冇準則？佢笑話：「冇，邊個熱情咪錫邊個囉!」講到Michael提議合作拍電影，Sam哥話：「或者會拍《新最佳拍檔》，人選方面一定係麥嘉，其他未定。」