陳龍生（Teddy）除與陳澤威（Andrew）經營AfterShip外，另私人持有一間貿易公司，有車、有樓、甚至有飛機。今日有所成就，Teddy表示，過去生意的失敗經驗，令他比人更快了解從商之道。

「當年你覺得好辛苦，好SUFFER，依家望番轉頭，其實幾美好。好似我俾人呃過，依家唔會再俾人呃，如果嗰時唔俾人呃，我唔會做MP3機，我又唔會做AfterShip。你冇必要糾纏唔開心嘅事，如果唔係我老豆早死，我未必早生性呢。凡事唔好只係望一面。」

Teddy於浸會大學就讀大學一年級時，曾與人合夥成立公司，出售水貨視象會議系統。作為「科技潮人」，當時已懂得配合那年代鮮為人識之網上行銷，於搜尋器、論壇落廣告。公司首年即賺100萬元，豈料被拍檔「穿櫃桶」走佬，不但1蚊都冇袋，反而背負10多萬元貨數。

未畢業已負債，Teddy當時曾向大學老師尋求意見，豈料竟遭反問，「你返學係為讀書定做生意？」令他非常氣憤，「如果你辦學，你會想有1萬個學生畢業後，做1萬個鴨仔，定係你想要一個LarryPage，一個朱克伯格出來，你揀邊樣？……你教我出來，你唔係應該較我點做生意咩？大佬，你開MBACOURSE，依家我現實中面對問題，你最少同我講，你去搵小額錢債，或者應該搵律師，但佢當時冇。」

一如今日報道所指，為避免自己轉牛角尖，索性花盡2萬多元身家與女朋友遊日，回港後開始於eBay銷售中性品牌MP3機，「我當時去深圳華強北入貨，自已一個拎住過百萬人仔現金過關。」經營有道，MP3機生意令他一個月內清還所有欠款，一年內，高峯期收入達數千萬元，更令他發現包裹追蹤平台的無限商機，從而成立AfterShip。

目前原本經營MP3的貿易公司，現已轉型銷售玩具，「其實（賣玩具）唔係好好賺架，不過當你冇財政壓力時，你可以揀你鍾意做嘅嘢。我賣嘢，可以賣棺材、山地，賣咩都得，但有咩嘢，你賣咗俾人，佢收到時一定開心？就係玩具。當然，因為我自己細個窮，冇玩具，成日想要多啲玩具，點知依家全公司都係玩具時，你發現你係冇時間玩。」

講起生意經，Teddy有自己一套想法，「我覺得做生意，你可以咩生意都做晒，賺晒每一個人袋裡面既每分錢，但我唔想，我唔會賺盡，如果我賺到盡，意味盤生意沒落。我見好多人做生意做到要減人工，咁唔該門生意你唔好做。」

記者：倪敏慧
攝影：李家皓、張志華、張柏基
今日專題報導：
AfterShip獲名牌基金注資　包裹追蹤服務商加薪30%挖角
http://hk.apple.nextmedia.com/financeestate/art/20140708/18792009
創辦人讀書時靠網絡賺錢
http://hk.apple.nextmedia.com/financeestate/art/20140708/18792011