曾擔任人行行長、天津市市長和社保基金理事長的戴相龍，近期不時傳出被查。不過，人行主辦的《金融時報》，上周五以頭版刊登佢嘅專訪，以內地慣例，戴相龍可以咁高調蒲頭，好可能已經過關。
內地太子黨最鍾意喺金融圈搵食，已經被外媒開咗名的紅二代包括國家前主席江澤民之孫江志成、前總理溫家寶兒子溫雲松、前政協主席李瑞環兒子李振福等。至於戴相龍女婿車峰，外媒曾報道，曾以極低價買上市前的平保，獲利數十億元，亦於2007年天津被作為「港股直通車」試點前，大撈港股。
中紀委書記王岐山為金融專家，央企反腐咁犀利，但金融業一直冇動靜，連巡視組都未派過。戴相龍一直被視為最先出事的金融大老虎，而家連佢都冇事，何況其他紅色權貴。

黃尹華