媒體一直叫他做李浩宏，他說是以訛傳訛的誤會，着記者叫他Howard就好。再嘗試問他的真實年齡，他再搖頭說：「我唔想講出嚟，總之就係 40以下。」

現實生活中的Howard，眼前男子不願多談。但只要梳起油頭，戴上黑色粗框眼鏡，穿着黑色暗紋條子中山裝，面對媒體和社會大眾，他卻變得如魚得水，甚至可說有恃無恐。「一着咗呢套衫就咩都做到。」說罷，他便在鬧市中隨意對着途人大叫：「Hello！冚X鏟！」途人竟然興奮尖叫，爭相與Howard合照。

這時候的他，不是Howard，是「A貨金正恩」。
記者：陳芷昕
攝影：王子俊

身為全球首位模仿北韓領導人金正恩的演員，Howard屢屢登上各大國際媒體。最近他又紅了，因為2月底「特金會」前夕，他與模仿美國總統特朗普的加拿大男子Russell White，在越南河內高調出巡，結果抵達即日已被警方跟蹤，數日後更被越南政府以簽證無效為由遞解出境。於是Howard又成了國際話題人物，傳媒紛紛引述他在個人facebook專頁「A貨金正恩」上，控訴越南政府打壓民主和自由的言論：「我被定罪的真正原因，是我生來似金正恩。（"The real reason is I was born with a face looking like Kim Jong-un; that's the real crime." ）」

「外國大把模仿藝人，係認真嘅事業。我覺得有得玩，仲可以做好耐，因為佢唔會落台。」

有幸一睹「A貨金正恩」真身的記者，採訪前也不禁翹首以待起來：到底有多相似，才會變成一種罪？訪問於Howard的中環住處進行，在樓下等待之際，一個身穿粉紅色短袖上衣、頂着大肚腩的男子朝記者揮手——事實上，他不需要揮手——雖然未有穿上中山裝，但憑那標誌性髮型和五官，記者也能即時認出他來。尾隨Howard上樓時，不難發現有途人忍不住回頭竊笑。Howard從容不迫，看來對這些反應已習以為常。

香港出生，澳洲成長，再回港定居的Howard，是音樂創作人。2011年12月17日北韓領導人金正日逝世，金正恩接班後，Howard的人生亦開始改變。「我當時一望呢條友，咁鬼似我嘅。連我女朋友、家人、朋友個個都咁講」。單講外表，似金正恩未必值得開心。回想當年感受，Howard只送上四個字：「X你老母。」他亦因此要遮遮掩掩，出門戴帽，以防百姓把他「認出來」。2013年4月1日愚人節，Howard貪得意在fb創立名為「Kim Jong "UM"」（金正恩英譯為Kim Jong Un）的專頁，上載幾張他模仿金正恩的相片，結果馬上被全球網友瘋傳，翌日他更登上Google搜尋榜首。一炮而紅令Howard倏忽萌生鬼主意：「喺外國大把模仿藝人，係一個認真嘅事業。當時我係全世界第一個扮金正恩，我覺得有得玩，而且仲可以做好耐，因為佢唔會落台嘛。」

從此，Howard就以A貨金正恩名號行走演藝江湖。與別號「金三胖」的金正恩一樣，Howard本來就是個110公斤重的胖子，這方面算是可以省點功夫。「我冇動力減肥，因為食多啲仲似佢」。雖有先天優勢，但要扮到極致，原來每次要耗時五小時裝身，「好似你做生意都要裝修，模仿都要投資」。除了穿上他特地找裁縫師傅訂製的中山裝外，更要塗白一張臉，以遮瑕膏蓋掉臉上幾顆痣。髮型也是不可或缺，Howard只好為藝術犧牲。最初，他遍尋髮型師無獲，「佢哋都唔鍾意整呢個頭，覺得好核突，同埋我好奄尖」。皇天不負有心人，Howard最後還是找到師傅，一剪就是四年。Howard時時刻刻留意金正恩最新動態，一轉髮型，他就帶同照片去找師傅修剪。他也怕自己「跟車太貼」，大眾會追不上：「我𠵱家係keep住佢2018年去新加坡（首次特金會）嘅style，佢𠵱家頭髮係再低少少，好少㗎咋。」Howard再即場示範幾套招牌動作，包括揮手、怒目圓瞪及微笑。「好多時大陸人一見到我瞪大雙眼扮惡，都會驚一驚，要諗諗我係咪真人」。

「我有一排用金正恩造型玩Tinder，好多女撲埋嚟，仲要我金正恩咁嘅樣同佢出街。」

要做世界認可的A貨，Howard絕對精益求精，每一細節力求完美。記者好奇，如此落力是為了甚麼？他大方直言：「扮金正恩係我主要收入來源。」說回故事起點的2013年愚人節，兩星期後，Howard便以A貨金正恩身份接到第一份工作，老闆是一家以色列快餐店。「當時麥當勞搵咗A貨奧巴馬拍廣告，咁佢就諗，不如拍個廣告搵A貨金正恩炸咗美國。」結果廣告大受歡迎，Howard的演藝工作自此從未間斷。「如果你請我去一個party，少過100人，就每個鐘8,000港元起跳；拍廣告10萬蚊一次，因為我一出街，就可以幫一間公司拎到好多上報機會。好多牌子請歌星明星，但你幾何見過人渣總統？」除了錢，也有意外收穫。「我有一排用金正恩造型玩Tinder（手機交友程式），好多女撲埋嚟，仲要我金正恩咁嘅樣同佢出街」。

託金正恩之福，Howard享盡名利女色。但他偏偏又不安守本份，常以A貨金正恩之身犯險。出道首年，他就曾在香港「微服出巡」，先後去美國和南韓等駐港領事館申請「庇護」，結果自然被驅趕。去年2月南韓平昌冬奧，南北韓女子冰球聯隊對戰日本期間，Howard故意在北韓啦啦隊面前走過揮手，女孩們表現震驚，也有人忍俊不禁，然後數名保安人員隨即將他制服，再由警方進場押走他。去年6月新加坡舉行首次特金會，他甫現身機場，馬上被當地警方扣留兩小時，不准他前往美朝會議選址聖淘沙和香格里拉酒店。更不用說才剛發生於上月底的越南特金會。

事實上，其他A貨金正恩都沒Howard般張狂。「有一個南韓A貨金正恩，佢冇我去到咁盡，因為北韓政府hack咗佢email，叫佢唔好去到咁盡，唔係會搞佢屋企人」。對於自己所作所為的危險程度，Howard也心知肚明：「我唔會去北韓，因為我知我去咗就返唔到嚟，我知佢已經識我，我已經喺黑名單上」。就連其母也一早為他買了保險，「如果我畀人謀殺，起碼佢會有啲錢」。說得雲淡風輕，看來Howard真的不把「美帝」口中的「邪惡軸心」放在眼內。「我唔驚，驚就唔會做啦」。為甚麼？「第一我係香港人、中國人、澳洲人。中國係北韓唯一嘅朋友，所以我估佢唔敢搞我。第二，我鍾意搞佢哋囉」。

Howard口中的「佢哋」，是獨裁者。「北韓又好，大陸又好，都唔鍾意我哋呢啲人。如果你笑我，其實你係笑緊『上帝』，笑緊佢成個形象」。生就這張臉，Howard不覺可憐也不可恥，他深明自己的臉有多大威力。2014年10月，傘運已步入尾聲，外國媒體對相關報道的熱情逐漸冷卻，他又以A貨金正恩身份站出來，在大台高呼「No North Korean style elections in Hong Kong!（香港不要北韓式選舉！）」

「我好鍾意黃之鋒嗰班人嘅抗爭，不過太serious，啲人就會唔想理；但如果你搞笑，啲人就會去注意你」。結果如Howard所願，「我講完大家都笑，報紙又周圍登，所以因為我呢塊面，我起碼幫到佢哋少少」。即使靠臉掙錢，他自認是有道德底線的演員：「我接嘅每一個工作都係搞緊金正恩笑。」曾有新加坡旅行社請他宣傳北韓旅遊團，他馬上推掉：「金正恩就係靠呢啲食到咁肥。」

A貨金正恩是獨裁者的一面鏡子，映照人性的真實，旨趣在諷刺與戲謔。Howard目前還正在收集各國的「A貨世紀賤人」，以壯大「邪惡軸心」勢力：「我已經搵到特朗普、普京，兩星期前又俾我搵到菲律賓總統杜特爾特，𠵱家係差習近平同巴西總統Jair Bolsonaro。」儲齊一套後有何打算？原來Howard早已盤算好。「我同A貨特朗普都識打鼓，之前我哋搞咗個『北韓VS美國』嘅鬥鼓表演。嚟緊我哋都會有隊樂隊叫『Tyrants』（暴君），中文名我諗叫『賤人樂隊』，如果搵到識音樂嘅習近平同普京，就可以一齊玩」。

「大把人大波、靚仔，但有幾多人係金正恩？你未必鍾意我嘅音樂，但起碼都會記得我。」

賤人樂隊的曲和詞，Howard已準備就緒，目前他正為拍MV和錄音儲錢。看來即使未脫下金正恩的妝容和華服，Howard還是最記掛他的音樂。「如果我有得揀，我想就咁打鼓，唔想理其他嘢。我從來冇諗過要做藝人或模仿演員，係一個意外」。事實上，Howard有份製作的《巴西音樂俱樂部》去年入圍台灣金曲獎「最佳專輯製作人獎」，但單靠音樂不足以生活，何況這張大碟耗了他上百萬港元，幾乎是他這些年來靠A貨金正恩賺來的所有。

「𠵱家叫人畀100蚊買一隻碟，佢會覺得有冇搞錯呀！應該免費㗎喎！所以歌星要大波、要靚仔，先吸引到人去幫襯佢」。但Howard決定不埋怨現實，因為他還有金正恩的外表。「大把人大波、靚仔，但有幾多人係金正恩？就算你未必鍾意我嘅音樂，但起碼都會記得我：let’s see what he does with music！」