溫碧霞（Irene）當年15歲，就憑電影《靚妹仔》一炮而紅，再因電視劇《火玫瑰》中海潮一角，人氣急升，隨即被唱片公司發掘，歌影視三線發展，唱片仲熱賣到大陸，91年推出首張大碟「溫碧霞Irene」，之後喺短短幾年間，共推出過8張個人唱片。

其後因為喺大陸發展，專注拍電視劇同電影，暫停出唱片好一段時間，Irene為答謝36年嚟香港嘅fans一直以嚟嘅支持，決定喺下個月19日，於旺角麥花臣場館舉行首個演唱會「溫碧霞海潮演唱會2018」，門票今日正式公開發售喇！，

早前Irene為演唱會拍攝兩款海報，一款背景布滿鮮花，另一款係赤膊玩黑白feel，最後Irene揀咗露肩黑白feel作為今次演唱會海報，Irene話：「黑白feel好似我嘅性格咁有個性，我想我嘅演唱會畀大家睇到真正嘅溫碧霞，唔單只識演戲，其實我仲識唱歌同跳舞。到時我會唱自己演過嘅電影、電視劇主題曲，同埋其他歌手嘅經典金曲。」

精選娛聞，喺晒《娛果》
http://fb.com/appledailyent