暑假唔係一定要外遊唞暑，家都有唔少本地酒店推出暑假住宿優惠計劃，噚日同新開張嘅南灣海景酒店（L'hotelIslandSouth）公關David傾開，佢話酒店離海洋公園15分鐘步程，近水樓台先得月，率先同公園合作推出住宿連公園門票優惠，二人套餐$988，包住房一晚連雙人自助早餐及雙人兩日公園門票。
David話，心水清啲就知呢個package好抵，一張公園成人飛$250，兩個人玩兩日都要一千蚊，$988齋買飛都唔夠啦，套餐變相免費住酒店連埋早餐。仲有三人套票（兩成人，一小童）同四人套票（兩成人，兩小童）選擇，價錢分別係$1,088同$1,288。

帝景推9個興趣班

荃灣汀九帝景酒店公關Coby打畀小妹，佢話酒店推出咗四款暑假住宿套餐，最平抵玩套餐$788，包兩大一小住宿連三位自助早餐；識飲識食套餐房價$888，回贈$500餐飲現金券；馬灣挪亞方舟套餐房價$988，包三張方舟一日遊通行證；按摩住宿套餐房價$1,688，包雙人早餐連60分鐘按摩護理。
Coby話，暑假期間酒店會推出餐桌禮儀、甜餅廚藝班等9個興趣班，參加嘅顧客可以免費任選一班，呢個周末係記憶深測班同心靈藝術班。

電郵：mailto:[email protected]