妍希BB早前同老公仔陳曉喺男方家鄉合肥領證結婚，今日喺北京雁栖湖島上搞盛大婚禮，早上亦有跟足傳統，進行接新娘及斟茶儀式。

大會發片用咗美國唱作歌手PhillipPhillips首《GoneGoneGone》為背景音樂，鏡頭一開始見婚禮場地及妍希BB嘅花球，跟住見一雙雙靚靚嘅高踭鞋，畫面一轉就見妍希BB坐定定喺度化妝及戴上龍鳳手鐲，拍攝團隊亦佈置緊新房，一班姊妹團鍾欣潼、陳喬恩等開心影合照，而新郎哥陳曉率領戥穿石去接新娘前，佢哋都不忘玩selfie，仲排排坐影咗一張chok爆「大爺feel」嘅相。

陳曉行入去接妍希時，單膝跪地宣讀愛的宣言：「我會好好照顧你，還有好好照顧你們，我最親愛的老婆，我最親愛的好老婆，我會愛你一生一世!」妍希聽完即笑晒，露出「腰果眼」，主動攬實陳曉，兼情深咀嘴，化身「接吻魚」。