經常「試咪」的盧海鵬，負責頒發「最佳視覺效果」同「最佳音響效果」，呢兩個都係由《寒戰》奪得，並分別由鄭文政及曾景祥獲獎。盧海鵬頒獎時大爆金句，佢話攞獎心願已償，頒獎就一世有福享。但鵬哥話佢百思不得其解，點解佢要頒呢兩個獎，同佢好似冇乜關係，佢係撈戲，唔係撈聲。

跟手鵬哥又再講「試咪」，仲自問自答話，可能因為佢成日「試咪」，令人以為佢對音響好執著，故今次搵佢頒呢兩個獎。鵬哥笑言﹕「所以一定要試咪，效果好咯，有得入圍，如果 試咪效果試得唔好，佢就會搵你老母呀﹗ 」語畢即全場爆笑，此時鏡頭影住杜汶澤O晒嘴望住田蕊妮，鵬哥，好波呀﹗

另外，著名攝影師黃岳泰負責頒發向「先鋒致敬獎」，並由柯達亞太地區董事長Mr.LoisLebegue領獎。