《羅生門》嘅不捨和殘忍，除了令不少人憶起心裡那個「她」，亦有人猜想Juno心中嘅女主角係咪前緋聞女友鍾欣潼（阿嬌）？Juno噚日喺訪問內否認其事：「唔係，因為我哋明顯個方向係十二年前《耿耿於懷》，的確HelloKitty同茉莉香水係有解釋嘅，十二年前真係興呢兩樣嘢，但係我阻止唔到人哋嘅幻想空間。都有人幻想個男仔最後係咪去咗冰島自殺，又有人相信會happyending，但係出面嘅反應，唔會左右到我嘅原意，唔會因為咁令原本六首歌變成十八首歌。」

咁《羅生門》係咪佢經歷？Juno笑指自己係監製、編劇，而黃偉文亦係另一個編劇：「唔關係我過去經歷，係承接十二年前個故事，睇下可以點進化，睇下對生活細節有幾敏感去創作。我相信如果首歌只係講單戀而對方唔接受，呢個故事唔吸引我。人性好複雜，分離唔代表兩個人唔愛，相愛亦唔等於好了解對方，《羅生門》兩個人係分開但愛對方，不過唔了解對方，當中有好多誤會，就連佢哋承諾無論係點都好，十年後相約嘅地方，呢個係佢哋之間最浪漫嘅事，但係最天大嘅誤會就係，連相約嘅地方都係誤會，男仔以為去冰島，女仔以為去福島，去表達個男仔嗰種盲同缺點。」

「呢啲誤會每日都發生緊，我都總會有，唔止係情侶，知己、好朋友同工作伙伴都可以有誤會。我唔會因為誤會人哋而內疚，都係好淺嘅誤會，好似有人覺得我唔笑好惡，或者唔出聲一定係個腦有鬼主意，其實我係發緊呆，或者咁講，我唔擅於笑。不過我唔相信事情可以冇瑕疵，就係有瑕疵先完美。」

至於感情上可曾有誤解？Juno就話自己係一個唔鍾意嗌交嘅人：「我OK0架，因為我鍾意聆聽亦都樂於聆聽。」

回到現實世界，日前戴庚玲（Janine）被指在instagram上暗示二人訂婚，Juno聞言謂：「幻想力豐富，0依家冇諗過結婚，因為唔特別相信婚姻，我相信愛一個人，但係唔特別相信愛一個人，就等於要結婚，而且現實地好多人結婚，都可以唔牽涉愛，如果有日結婚我會講。」

佢又表示與Janine最浪漫嘅承諾係養貓，Juno笑說：「由我唔識得養動物，到我發現原來自己係鍾意貓，都係最浪漫嘅承諾。」