日本女星酒井法子於09年爆出毒案，自此之後即人氣急跌，近年佢已從主流藝人陷入事業低潮，由於已被當地多間電視台列入黑名單，酒井冇得上螢光幕，當場要搵其他商機，而佢一直深受強國人歡迎，所以最近就搞咗個郵輪旅行，呢個由上海出發嘅五日四夜旅行，酒井同埋fans乘坐皇家量子號前往福岡，前日已返抵上海，酒井於郵輪上以歌會友，仲大唱金曲《碧藍色的小兔》。

酒井法子近年積極洗底，近日再推出全新唱片《Truth》，重唱《碧藍色的小兔》及翻唱其他歌手舊歌，下星期一更會去池袋搞粉絲見面會。酒井在出事後一度轉戰彈珠機界舉行活動，而近年佢開晚餐騷亦反應熱烈，今日出版嘅雜誌《週刊文春》指，酒井12月開鑼嘅晚餐騷都吸引大量內地粉絲搶飛，出現「爆買」情況。其實「爆買」呢個字眼，近年喺日本人心目中同中國遊客已經成為等號，估唔到強國人去日本「爆買」電器同埋藥物後，今次輪到酒井嘅晚餐騷門券。