吳綺莉涉虐兒事件後，愛女卓林在醫院休養，吳綺莉連日面對追訪，亦正式復工，今午去到元朗八鄉香港寵物公園，為有線節目《寵物ER》添食第二輯首集開工。眼見吳綺莉精神較日前飽滿，開工前還親自參與set頭扮靚，心情較日前開懷，問到佢掛唔掛住女兒？吳綺莉謂:「你話呢？」心情如何？佢續說:「開工囉，一路都係咁。」

接住吳綺莉就在戶外投入拍攝工作，身水身汗，午飯前再大方受訪，乘機sell主持節目，話呢輯講人狗溫情，自己遲啲都有機會養多隻貓。

講到卓林出院未，吳綺莉話:「唔清楚出院未，睇番嗰邊同佢情緒決定，唔係我控制。」坊間指吳綺莉接觸唔到女兒，佢話:「唔係接觸唔到，係想畀佢靜下先。」

最新雜誌話吳綺莉只透過卓林契媽得知女兒狀況，而卓林日前想出院，但知有傳媒守候情緒失控，連媽媽電話都唔肯聽，吳綺莉直認:「係呀，想畀多啲空間佢，始終小朋友。」至於出院後會否暫由契媽看管卓林，吳綺莉話:「呢輪忙工作，成個星期都外景，交哂畀社工處理。」

見到愛女咁樣，做媽媽的亦感心痛，但吳綺莉向來硬淨，佢話:「每樣嘢都有經歷同學習。呢段時間唔想騷擾佢，畀佢休息下，事件交哂畀律師處理。反而有少少擔心學業，始終highschool。」

吳綺莉又謂希望卓林快啲好番，如果能夠同卓林相聚，吳綺莉第一時間就想同愛女講:「大家一齊長大成長，無論發生乜嘢事，都係屋企人。每個屋企都有問題，我哋要去面對，積極學習。」

問到吳綺莉呢兩日瞓得好唔好，佢笑住話:「都ok啦！」唔使飲酒？「講第二啲啦。」至於成龍可有關心事件？吳綺莉都係嗰句:「人哋嘅嘢唔關我事。」

相關新聞:
要靠社工與囡囡卓林溝通吳綺莉：學習做更好嘅媽媽
http://bit.ly/1LwBSiH