明天（7月1日）要揀騎師捧場，不妨考慮波健士及田泰安，前者明言渴望下季在港發展，這五日客串期可視作考牌。

至於田泰安早前被網民評選為垃圾級別騎師，姑勿論閣下認同與否，田泰安的頭馬數字算是高企，換言之他經常有好馬在手，今次（7月1日）停賽期滿復出為挽回面子，也值得調高評級。

早前提過告東尼目前頭馬數字與上季極為接近，預計煞科前不會多贏，以今戰列陣馬分量不弱兼好幾駒今季零頭馬仍要交代，說不定明日會成為告東尼今季「埋齋戰」。

尾場三班1400米「綫路勇駒」，上仗配史卓豐跑1400米具全面取勝機會，但騎師當日出現中暑情況，尾場更要退下火線，亦見騎者跑第九場的「綫路勇駒」到埋門幾步已有心無力，結果只得第二名。

以該駒早段有懶性要騎住逼起前速，正合年輕有活力的波健士發揮，今次有力補中。

田泰安走位差不時被人詬病，所以吼他入直路飛出外叠衝的馬比較安心。

第八場三班1200米「好心傾」剛田草1200米奪季，北半球自購馬初踏升軌多持續見好，今次發力點掌握得更佳的話，可叩開勝關。

-----------------------------
7月4日起 《蘋果動新聞》只限升級壹會員閱覽
繼續撐蘋果！